Haustfundaröð SA um Ísland

Samtök atvinnulífsins efna til opinna funda í september og október víða um landið. Haustfundaröð SA ber yfirskriftina Atvinnulífið 2018 en hún hefst í Vestmannaeyjum á morgun, þriðjudaginn 19. september.

Allir eru velkomnir en nauðsynlegt er að skrá þátttöku á vef SA. Boðið verður upp á kaffi og með því og krassandi umræður. Áhugafólk um uppbyggingu atvinnulífsins og öflugt mannlíf er hvatt til að mæta og láta í sér heyra en fulltrúar SA hlakka til að hitta stjórnendur og starfsfólk öflugra fyrirtækja á landsbyggðinni og horfa fram á veginn. Þá munu stjórnendur  á hverjum stað ræða stöðu mála á sínum heimavelli.

Á fundunum munu Eyjólfur Árni Rafnsson, formaður SA, Halldór Benjamín Þorbergsson, framkvæmdastjóri SA, og Ásdís Kristjánsdóttir, forstöðumaður efnahagssviðs SA rýna í stöðu og horfur á vinnumarkaði. Hagvöxtur er mikill, gengi krónunnar sterkt og verðbólga lág en það eru blikur á lofti. Niðurstöður kjarasamninga í vetur munu ráða miklu um lífskjör Íslendinga á næstu misserum. Þá verður einnig fjallað um á hverju framtíðar hagvöxtur Íslands mun byggja. Að loknum erindum fara fram umræður og fyrirspurnir.

Opnir fundir SA verða á eftirtöldum stöðum:

  • Vestmannaeyjum þriðjudaginn 19. september kl. 12.00-13.30
  • Akureyri miðvikudaginn 20. september kl. 8.30-10.00
  • Sauðárkrók miðvikudaginn 20. september kl. 16.30-18.00
  • Neskaupstað þriðjudaginn 3. október kl. 12.00-13.30
  • Höfn mánudaginn 10. október kl. 12.00-13.30
  • Stykkishólmi þriðjudaginn 17. október kl. 17.00-18.30
  • Reykjanesbæ miðvikudaginn 18. október kl. 12.00-13.30
  • Reykjavík fimmtudaginn 19. október kl. 8.30-10.00
  • Ísafirði þriðjudaginn 24. október kl. 12-13.30