Samtök ferðaþjónustunnar

Skonnortan Hildur nýjasti bátur Norðursiglingar á Húsavík sigldi til heimahafnar á Húsavík 16 júlí síðastliðinn, eftir gagngerar breytingar í C.J. Skibs- og Bådebyggeri í Egernsund í Danmörku.

Báturinn var upphaflega byggður árið 1974 á Akureyri af skipasmiðunum Trausta og Gunnlaugi. Norðursigling keypti bátinn síðast liðið sumar frá Stöðvarfirði en hann hét þá Héðinn HF 28. Um haustið hlaut báturinn nafnið Hildur og var henni siglt til Danmerkur þar sem henni var breytt í tveggja mastra skonnortu.

Þar með eru hefðbundnar skonnortur við strendur Íslands orðnar tvær en fyrir á Norðursigling skonnortuna Hauk. Báðum skonnortunum svipar mjög til fiskiskonnorta þeirra sem algengar voru á hákarlaveiðum við Norðurland á 19. öldinni en eitt meginmarkmiða Norðursiglingar hefur frá upphafi verið varðveisla gamalla, íslenskra eikarbáta og um leið að viðhalda kunnáttu sem nærri er gleymd.