Samtök ferðaþjónustunnar

Hagstofa Íslands hefur í fyrsta sinn birt ferðaþjónustureikninga fyrir Ísland samkvæmt alþjóðlegum stöðlum. Niðurstöður þessara reikninga sýna meðal annars að árin 2000-2006 var hlutur ferðaþjónustu í landsframleiðslu að meðaltali 4,6%. Árið 2006 námu heildarkaup á ferðaþjónustu innanlands tæplega 135 milljörðum króna, eða sem svarar 11,5% af landsframleiðslu. Kaupin skiptust þannig að kaup erlendra ferðamanna voru 70,6 milljarðar króna eða 6% af landsframleiðslu, neysla heimilanna var um 56 milljarðar eða 4,8% af landsframleiðslu og kaup fyrirtækja og opinberra aðila voru 8,2 milljarðar króna eða 0,7% af landsframleiðslu.

Útgáfa þessara reikninga hefur verið eitt af áherslumálum Samtaka ferðaþjónustunnar og er því ánægjulegt að sjá að þessum áfanga er náð. Mikilvægt er að þessum útreikningum verði haldið áfram til að fá fram rétta mynd af umfangi ferðaþjónustunnar bæði hvað varðar hlutfall af landsframleiðslu og hlutfall af gjaldeyristekjum.  

Nánari upplýsingar er að finna í riti Hagstofunnar hér