Á vef mennta- og menningarmálaráðuneytisins má nú finna kynningu á drögum að nýrri námsskrá um iðnmeistaranámið. Iðnmeistaranáminu verður skipt upp í þrep (grunnnám, fagnám og iðnfræðingsnám) þar sem grunnámið verður sameiginlegt öllum greinum  þ.e.a.s í stjórnun, rekstri, kennslu og stofnun fyrirtækis, eftir grunnám kæmi svo faggreinatengt rekstar og stjórnunarnám tengt hverri grein – sérgreinatengt fyrir bakstur, framreiðslu, matreiðslu og kjötiðn eftir atvikum. Í framhaldi af því gæti komið nokkurs konar iðnfræðingsnám.    Sjá meðfylgjandi upplýsingar um námsskrárdrögin hér að neðan og frest til að gera athugasemdir: 

Námskrárdrögin eru unnin með hliðsjón af ákvæðum laga nr. 92/2008 um framhaldsskóla. Námið er hæfnimiðað og fellt að viðmiðaramma um íslenska menntun. Það er aðlagað nýju sniðmáti um gerð námsbrauta sem m.a. byggir á nýrri skilgreiningu á námseiningu í framhaldsskóla. Í námskrárdrögunum er lýst þeim ramma sem náminu er settur og skilgreindar kröfur um þekkingu, leikni og hæfni í grunnþáttum sem eru sameiginlegir öllum iðngreinum.

Námskrárramminn er leiðbeinandi fyrir frekari námskrárgerð skóla og annarra fræðsluaðila sem hyggjast leita eftir staðfestingu ráðuneytisins á námsbrautarlýsingum iðnmeistaranáms fyrir einstakar iðngreinar eða iðngreinaflokka.

Námskrárdrögin verða til kynningar á vefsvæði þessu til 26. mars 2010. Á þeim tíma gefst hagsmunaaðilum og almenningi kostur á að senda athugasemdir og ábendingar um námskrárdrögin í heild eða einstaka þætti þeirra til menntamálaráðuneytisins, Sölvhólsgötu 4, 150 Reykjavík.

Einnig er hægt að senda athugasemdir á netfangið namskra@mrn.stjr.is.

Að loknu umsagnarferlinu mun ráðuneytið gera þær lagfæringar á námskránni sem nauðsynlegar teljast, staðfesta hana og senda auglýsingu um gildistöku hennar til birtingar í Stjórnartíðindum. Námskráin verður að því loknu birt á námskrárvef ráðuneytisins.

• Drög að nýrri aðalnámskrá framhaldsskóla fyrir iðnmeistaranám (PDF)