Samtök ferðaþjónustunnar
www.saf.is - info@saf.is

Hættum að strita fyrir ekki neitt

-Ræða Andra Más Ingólfssonar, forstjóra Heimsferða á aðalfundi SAF, Samtökum ferðaþjónustunnar

Ef við lítum til baka – til sögu fjárfestinga í ferðaþjónustu þá blasir við að margir hafa viljað láta að sér kveða en fráleitt hafa allar ferðir verið til fjár. Við minnumst ferðaskrifstofa, hótela, bílaleiga, flugfélaga sem ekki eru starfrækt í dag. Arðsemi fjárfestinga hefur ekki verið næg. Við höfum nálgast ferðaþjónustu – mörg hver – á röngum forsendum.

Fólk hefur lagt hart að sér – ár eftir ár, án þess að arðsemi hafi verið ásættanleg, með vonina eina í brjósti. Því miður með lítt raunhæfar áætlanir og við höfum sætt okkur við lélega afkomu. Þá hafa fjölmargir átt erfitt með að vinna saman innan greinarinnar.

Við þurfum að breyta þessu – skapa sterkar einingar, hótel, ferðaskrifstofur, afþreyingarfyrirtæki sem eru eignalega sterk til þess að byggja til framtíðar. Við þurfum að vinna ötullega að því að opna nýja markaði, - afþreyingu fyrir ferðamenn og hækka þær tekjur sem við höfum af ferðamönnum. Ferðaþjónusta í eðlisínu er sveiflukennd. Þess vegna þurfa fyrirtækin að vera sveigjanleg til þess að geta þrifist.

Af hverju er framtíðin svona spennandi?

Af hverju er framtíðin þá svona spennandi? Það er vegna þess að ferðaþjónustan er sú atvinnugrein í heiminum sem vex hraðast. Ferðamönnum til Íslands hefur fjölgað ár frá ári og við höfum miklar væntingar til framtíðarinnar. Fáar greinar hafa vaxtamöguleika ferðaþjónustunnar. En við fáum ekki notið vaxtar nema breyta kúltúr fyrirtækjanna okkar – breyta hugarfari okkar. Ég verð að játa að mér fyndist nöturlegt ef við eftir fimm ár – og yfir 400 þúsund ferðamenn, búum ennþá við ömurlega afkomu. Þá er kúrsinn kolrangur. Við verðum að taka okkur tak – breyta hugarfari okkar.

Hvað er áhugavert við að búa til stórar einingar?

Það er eðlilegt að spurt sé: hvað er áhugavert að búa til stórar einingar? Jú, fyrirtæki hafa þá bolmagn – að því tilskildu að þau séu öflug og sterk – til þess að koma fram með nýjungar. Þróa nýja vöru, eins og markaðsfræðingar segja.

Við þurfum að finna jafnvægi framboðs og eftirspurnar eftir mörkuðum – Evrópu, Ameríku, Asíu og markaðssvæði innan þessara heimsálfa. Við þurfum að finna markaði og tímabil. Þá á ég við að laga markaðssetningu að árstíðunum fjórum. Fyrirtækin þurfa að hafa fjölbreytta “körfu” að bjóða úr.

Árum saman voru leiðandi ferðakskrifstofur reknar með tapi. Það þótti ásættanlegt á þeim tíma, en sá tími er liðinn. Við megum ekki sætta okkur við taprekstur.

Hótel í miðbæ Reykjavíkur

Það er von að spurt sé af hverju ég sé að fjárfesta í stóru hóteli í miðbæ Reykjavíkur. Það hafi verið stöðugt tap, ekki satt? – segir fólk. Að baki kaupum á húsi Eimskipafélags Íslands við Pósthússtræti eru vandlega ígrundaðar ástæður:

Hótelið okkar er einstök bygging, á einstökum stað í miðborg Reykjavíkur. Staðsetningin skiptir höfuðmáli.
Við hjá Heimsferðum höfum tengsla- og sölunet til þess að “selja” og markaðssetja hótelið okkar.
Við höfum tryggt fjármagn til langs tíma með það að markmiði að gefa okkur góðan tíma að byggja upp rekstur hótelsins.
Fjárfestingin stenst arðsemiskröfur miðað við hóflegar áætlanir.
Og síðast en ekki síst: við erum með dýrmætustu fermetra á landinu og hótelið er staðsett í miðborg Reykjavíkur, á ákjósanlegum stað með tilliti til ráðstefnu- og tónlistarhallar.

Hótelið verður opnað í mars 2005.

Mikill vöxtur, miklir möguleikar

Það er mikill vöxtur í ferðaþjónusta – ekki bara ér á landi, heldur um allan heim. Tækifærin eru til staðar. Við þurfum að nálgast þau af fagmennsku og einurð. Við verðum að komast út úr sjálfheldu tapreksturs. Aðgangshindranir virka ekki lengur – hindranir sem settu mjög svip sinn á markaðinn. Við þurfum því að vinna saman, því sameinuð verðum við sterkari.

Því segi ég: Hættum að strita fyrir ekki neitt. Byggjum upp öflug fyrirtæki sem verði eftirsótt af fjárfestum; fyrirtæki sem gefi eigendum arð og starfsfólki örugga atvinnu.