Samtök ferðaþjónustunnar

Samtök ferðaþjónustunnar
www.saf.is - info@saf.is

Ræða Matthíasar Kjartanssonar

SAF 26. mars 2004

Ágætu félagar.

Drottinn fékk eina viku til að skapa heiminn. Okkur þrem er falið að redda ferðaþjónustunni á Íslandi á 5 mínútum, sem er ólíkt flóknara dæmi að mínu mati.

Hvað viljum við? Hvað vil ég?

Við rúmstokkinn hef ég bænaskjal sem ég les reglulega. Það er mín heitasta ósk að smátt og smátt verði hægt að ýta á “delete” takkann og afmá liði sem ekki er nein þörf fyrir lengur. Sjálfsagt móðga ég einhverja en vonandi hreyfi ég við öðrum og er þá tilgangnum náð að mínu mati.

· Ég vil fagmennsku í atvinnugreininni.

· Ég vil afþreyingaraðila eða byrgja sem ekki stela af mér kúnnum við fyrsta mögulega tækifæri.

· Ég vil afþreyingaraðila eða byrgja sem ekki standa í tilboðum og/eða undirboðum beint til minna kúnna á sama tíma og þeir koma til mín og forundrast yfir því að viðskipti okkar við þá hafi dvínað milli ára.

· Ég vil að hótelrekendur, veitingamenn, afþreyingaraðilar og byrgjar gefi mér að minnsta kosti sama verð og skilmála og þeir gefa erlendum aðilum og hætti að hygla útlendum umfram innlenda kaupendur.

· Ég vil afþreyingaraðila eða byrgja sem eru með nægjanlegt rekstrarfé og þurfi ekki að leita til mín með fyrirframgreiðslur mörgum mánuðum fyrir komu gesta svo hægt sé að leysa út tæki og tól eða stugga við innheimtumönnum

· Ég vil afþreyingaraðila eða byrgja sem eru með nægjanlegt rekstrarfé til þess að þurfa ekki að mæta á þröskuldinn hjá mér, eldsnemma morguns sama dag eða daginn eftir að þjónustan er eða var veitt, til að rukka.

· Ég vil að flokkunarkerfi gististaða verði stokkað upp og gististaðir flokkaðir bæði huglægt og áþreifanlega.

· Ég vil að hið opinbera, sem á að fara með eftirlit með ferðaþjónustunni, sjái til þess að ALLIR séu með ALLAR þær tryggingar sem þeir eiga að vera með skv. lögum.

· Ég vil að þeir sem ekki eru með þær tryggingar sem lög kveða á um verði stöðvaðir strax og meinað að halda uppi áframhaldandi starfsemi en ekki gefinn frestur til að “kippa málunum í lag”.

· Ég vil að eftirlitsaðilar sem eiga að fylgjast með t.d öryggisatriðum geri það og ef öryggisatriðum er ekki framfylgt, verði fyrirtækjum lokað og háum sektargreiðslum beitt. Lögin eiga að vera það skýr að það sé ekki nein ástæða linkindar í þessum málum. “Ef þú keyrir fullur, missirðu skírteinið”. Punktur. Engin aðlögun, enginn frestur veittur til að kippa þessu í lag.

· Ég vil að ferðaþjónustan, ekki síst á landsbyggðinni, dafni á eigin forsendum í frjálsu markaðsumhverfi og byggi á hugmyndum, frumkvæði og drifkrafti heimamanna en sé ekki á framfæri Byggðastofnunar eða sambærilegra fyrirgreiðslustofnana fyrir tilstuðlan misviturra pólitíkusa á atkvæðaveiðum.

· Ég vil að ferðaþjónustan á landsbyggðinni verði ekki fjármögnuð með styrkjum umfram ferðaþjónustu á höfuðborgarsvæðinu og að allir verði í því efni jafnir fyrir lögunum.

· Ég vil að ferðaþjónustan á landsbyggðinni sættist við ferðaþjónustuna á höfuðborgarsvæðinu.

· Ég vil að hótel verði reist um allt land á forsendum undanfarandi kannanna sem spyrji hvort raunhæft sé fjárhagslega að reka hótel á þessum stað allt árið, ekki eingöngu á háönn, og að gerðar verði raunhæfar tekjuáætlanir sem unnar verði í samvinnu við markaðs- og söluaðila.

· Ég vil að farið verði að reka ferðaþjónustufyrirtæki á forsendum arðsemi eigins fjár ekki bara vegna þess að “það sé svo gaman” að starfa við ferðaþjónustu. Ferðaþjónustan er ekki skemmtiiðnaður fyrir eigendur og starfsfólk þjónustufyrirtækjanna.

· Ég vil að hópferðabílar sem mér er boðið upp á verði flokkaðir og verðlagðir eftir aldri og gæðum.

· Ég vil að aðstæður skapist til frekari úreldingar eldri hópferðabíla.

· Ég vil að tilboðsbeiðnum og bókunum frá mér verði svarað.

· Ég vil að tilboðsbeiðnum og frá mér verði svarað innan sólarhrings svo við getum staðið undir okkar loforðum um að skila af okkur tillögum og tilboðum innan sólarhrings frá móttöku.

· Ég vil að fleiri flugfélög fari að fljúga til og frá landinu svo ferðatíðni aukist og verð hugsanlega lækki til hagsbóta fyrir alla þjónustuaðila, ekki síst ferðamennina sjálfa.

· Ég vil að ferðatíðni til meginlands Evrópu aukist utan háannar svo hægt verði að bjóða erlendum skipuleggjendum fjölbreytt úrval brottfararstaða til landsins og fjölbreyttan brottfarartíma frá landinu sem krefst þess ekki að vaknað sé um miðja nótt til að ná flugi.

· Ég vil að allir hér inni skilji að ferðaþjónusta er meira en bara það eitt að setja upp skilti við þjóðveginn.

· Ég vil að allir hér inni skilji að ferðaþjónusta er nákvæmlega þetta – þjónusta, ekki bara vara uppi í hillu og þaðan af síður iðnaður.

· Ég vil að látið verði af því að kalla ferðaþjónustuna ferðamannaiðnað, eða þess þá heldur ferðamannaútveg, og að allir skilji að þetta er fyrst og fremst þjónusta sem aflar þjóðarbúinu mikilla tekna, mikils gjaldeyris og skapar mikla atvinnu.

· Ég vil að laun starfsfólks í ferðaþjónustu nái því bráðlega að jafnast á við laun annarra starfsstétta í þjóðfélaginu og að starfsfólk í ferðaþjónustu verði ekki láglaunastétt um ókomin ár, líkt og verið hefur.

· Ég vil að við menntun fólks í ferðamálum verði hamrað á því að menntun sé EKKI æðri reynslu

· Ég vil að menntahroki sk. ferðamálafræðinga verði aflagður með öllu.

· Ég vil að hætt verði að telja ferðamenn á þeim forsendum sem það er gert í dag og að farið verði að telja eða áætla tekjur af þeim frekar.

· Ég vil að rannsóknastofnanir ferðaþjónustunnar, ef þær eru þá einhverjar, Hagfræðistofnun Háskólans og aðrir einbeiti sér að því að finna leið til að nálgast upplýsingar um hverjar tekjur okkar séu af ferðaþjónustunni svo hægt verði að leggja þessa Leifsstöðvartalningu af.

· Ég vil að ferðaþjónustan á Íslandi vaxi og dafni um ókomin ár og verði viðurkennd og skilgreind sem atvinnugrein, atvinnugrein sem er talað um af alvöru og festu, ekki bara nefnd og hampað á tyllidögum eða í áramótapistlum ráðamanna.

· Ég vil óska ferðaþjónustunni gleðilegs ferðaárs og að tekjur okkar þetta árið verði umfram kostnað.