Aðild.

Málsvari íslenskrar ferðaþjónustu

• Öflug samstaða – það eina sem dugar
  Fyrirtæki í ferðaþjónustu hafa aldrei fyrr átt sameiginlegan vettvang og málsvara. Það er mikilvægt að taka þátt í starfinu og hafa með því áhrif á fjölmargar ákvarðanir sem óhjákvæmilegt er að taka á næstu misserum eigi ferðaþjónustan að halda áfram að dafna og skila fyrirtækjum í greininni vaxandi arði. Nánast er útilokað fyrir hvert einstakt fyrirtæki að fá hagsmunamálum sínum framgengt, fylgjast með framvindu mála í stjórnsýslunni og grípa inní þegar þörf krefur. Öflug samstaða, sameiginleg kynning og markviss stefnumótun er það eina sem dugir í nútíma samfélagi. Fjölmörg hagsmunamál bíða þess að á þeim sé tekið.
• Áhrif á starfsumhverfi

  Með aðild að SAF geta fyrirtækin komið sjónarmiðum sínum á framfæri og þannig haft áhrif á gang mála. SAF er umsagnaraðili að lagafrumvörpum og gerð reglugerða og á sæti í ótal nefndum og ráðum og hefur þannig áhrif á starfsumhverfi fyrirtækjanna.

• Kjarasamningagerð – aðstoð við túlkun kjarasamninga

  Fyrirtæki í ferðaþjónustu eiga aðild að fjölmörgum kjarasamningum og sér SAF í samvinnu við Samtök atvinnulífsins (SA) um gerð þeirra, en öll aðildarfyrirtæki SAF eru sjálfkrafa félagsmenn SA. Öll aðildarfyrirtæki fá senda útgefna kjarasamninga, kaupgjaldsskrár og fréttabréf SA. Auk þess fá fyrirtækin endurgjaldslausa aðstoð og ráðgjöf frá bæði starfsfólki SAF og lögfræðingum og öðrum sérfræðingum SA varðandi starfsmannamál og túlkun kjarasamninga, umhverfismál, Evrópumál og fjölmörg önnur mál sem verið er að vinna að á báðum stöðum.

• Vinnumarkaðsvefur SA

  Félagsmenn í SAF fá sent aðgangsorð til að komast inn á vinnumarkaðsvef Samtaka atvinnulífsins, en þar er að finna alla kjarasamninga.

• Vinnudeilusjóður

  Aðildarfyrirtæki SAF eiga rétt á bótum úr sérstökum vinnudeilusjóði Samtaka atvinnulífsins ef stöðvun verður á atvinnurekstri þeirra að hluta eða öllu leyti af völdum verkfalls sem boðað er af stéttarfélögum starfsmanna. Sama gildir um stöðvun atvinnurekstrar af völdum verkbanns SA á starfsmenn aðildarfyrirtækis. Réttindin eru nánar skýrð í lögum SA.

• Menntun – námskeið

  SAF á í samstarfi við þá skóla sem bjóða menntun í ferðaþjónustu s.s. Hótel- og matvælaskólann, Leiðsöguskólann og hina ýmsu skóla sem bjóða ýmis konar ferðamálanám. Nú fer fram endurskoðun námsefnis og námstilhögunar víða fyrir atbeina SAF, en markmiðið er að námið þjóni atvinnulífinu sem best. SAF býður upp á námskeið og fræðslu, bæði fyrir stjórnendur og starfsfólk. SAF á m.a. aðild að IÐUNNI fræðslusetri.

• Aðgangur að fundum og þjónustu

  Félagsmenn í SAF hafa aðgang að fjölmörgum fræðslu- og félagsfundum sem haldnir eru á vegum samtakanna auk aðalfundar sem haldinn er á tímabilinu 15. febrúar til 30. apríl ár hvert. Þeir eiga enn fremur aðgang að þjónustu starfsmanna svo og margvíslegri ráðgjafa- og leiðbeiningaþjónustu fyrir milligöngu skrifstofu SAF.

• Útgáfa

  SAF gefur út ýmis konar handbækur, prentað mál, leiðbeiningar o.fl. fyrir félagsmenn.  Sjá nánar undir útgáfa í starfsemi SAF.

• Fréttabréf SAF

  Félagsmenn fá send rafrænt fréttabréf með upplýsingum um ýmislegt sem skiptir máli í rekstri fyrirtækja, bæði um hvað er að gerast í stjórnsýslunni varðandi ferðaþjónustuna, tilkynningar um fundi og annað gagnlegt.

• Sérkjör á vegum SAF

  Verið er að vinna að því að allir félagsmenn SAF fái sérkjör á ýmissi þjónustu, en í gildi eru sérkjör þau sem veitinga- og gististaðir fengu með veru sinni í SVG s.s. lægri þjónustugjöld hjá VISA og EUROCARD og umtalsverður afsláttur hjá STEF og 365 Miðlum ehf. vegna PubTv.

• Markaðstorg SAF

  Samtök ferðaþjónustunnar halda árlega markaðstorg í tengslum við aðalfund samtakanna þar sem kaupendur og seljendur meðal félagsmanna hittast og skiptast á skoðunum.  Allt starfsfólk ferðaskrifstofanna mætir á markaðstorgið og hefur þar gott tækifæri til að kynna sér vörur og þjónustu félagmanna.  Kostnaði við þátttöku í markaðstorginu er haldið í algeru lágmarki.

• Gæðastimpill SAF

  Öll aðildarfyrirtæki fá límmiða og spjöld með merki SAF til þess að merkja með fyrirtæki og farartæki til staðfestingar á að þau séu aðilar að SAMTÖKUM FERÐAÞJÓNUSTUNNAR. Í hugum viðskiptavina er ákveðinn gæðastimpill á fyrirtækjum sem eru félagar í samtökum viðkomandi greinar, það þýðir m.a. að viðkomandi fyrirtæki er með leyfi fyrir rekstrinum, það er alltaf kannað, og það þýðir ennfremur að viðskiptavinir geta snúið sér til SAF ef þeir hafa einhverjar athugasemdir við viðkomandi fyrirtæki.

Það er auðvelt að gerast aðili að SAF. Einungis þarf að fylla út umsóknareyðublað, sem þið getið prentað út frá heimasíðunni, og senda til skrifstofunnar ásamt ljósriti af starfsleyfi sé leyfis krafist vegna rekstursins. Við erum að sjálfsögðu reiðubúin að svara spurningum og gefa nánari upplýsingar símleiðis ef með þarf. Við hvetjum ykkur til þess að gerast félagar í ykkar eigin hagsmunasamtökum og hjálpa okkur til þess að bæta starfsskilyrði fyrirtækja í ferðaþjónustu.