SAF kynntu á dögunum 10 leiðir til að efla ferðaþjónustu á landsbyggðinni í beinni útsendingu á facebook síðu samtakanna.
Á síðustu tíu árum hefur uppbygging ferðaþjónustu um allt land leitt af sér meiri og fjölbreyttari uppbyggingu atvinnutækifæra, betri lífskjör og meiri möguleika til þróunar og styrkingar fjölda samfélaga fjarri höfuðborgarsvæðinu en áratugina þar á undan.
Vegna breytinga á samkeppnisstöðu áfangastaðarins Íslands hefur samsetning ferðamanna og ferðahegðun á Íslandi hins vegar tekið breytingum og slíkar sveiflur í samhengi við síaukinn kostnað og erfitt rekstrarumhverfi fyrirtækja þrengja ekki síst að ferðaþjónustufyrirtækjum á svæðum utan höfuðborgarsvæðisins.
Það er mikið hagsmunamál fyrir íslenska ferðaþjónustu, og samfélagið í heild, að rekstrargrundvöllur fyrir ferðaþjónustufyrirtæki um allt land sé góður, allt árið um kring. Það er nauðsynlegt fyrir vöruþróun og nýsköpun í greininni, auk þess sem það styður markmið um áframhaldandi styrkingu byggða, uppbyggingu heils árs atvinnutækifæra og dreifingu álags vegna umferðar ferðamanna um landið.
Samtök ferðaþjónustunnar hafa tekið saman 10 leiðir til að efla ferðaþjónustu, atvinnulíf og lífskjör á landsbyggðinni. Tillögunum er ekki ætlað að vera tæmandi heldur benda á ýmislegt sem er hægt og þarft að gera. Aðgerðir þessar krefjast að sjálfsögðu náinnar samvinnu hins opinbera og atvinnugreinarinnar.
Smellið á tenglana hér að neðan til að horfa á kynninguna eða sækja tillögurnar á pdf formi:
Upptaka frá kynningunni (20 mín)
SAF – fagmennska í ferðaþjónustu!
