Samtök ferðaþjónustunnar halda árlega ráðstefnu undir merkjum Ferðaþjónustudagsins sem fjöldi hagsmunaaðila sækir árlega, þar á meðal eigendur og starfsfólk fyrirtækja í ferðaþjónustu, stjórnmálamenn, starfsfólk ráðuneyta, sveitarfélaga og stofnana sem snerta ferðaþjónustu, fjárfestar, rannsóknaraðila og aðrir sem áhuga hafa á atvinnugreininni. 

Að þessu sinni halda SAF ráðstefnuna í samstarfi við Ferðamálastofu, Umhverfisstofnun, Vatnajökulsþjóðgarð og Þingvallaþjóðgarð, en þessir aðilar hafa átt í góðu samtali um áskoranir í tengslum við álagsstýringu á fjölsóttum ferðamannastöðum síðustu mánuði í kjölfar vinnu við aðgerðaáæltlun nýsamþykktrar ferðamálastefnu.

Samstarfsaðilarnir telja að mikilvægt sé að vinna að góðu samtali milli allra hagaðila um áskoranir og mögulega kosti og galla álagsstýringar á áfangastöðum til að byggja sem best undir þá áframhaldandi vinnu við málefnið sem mælt er fyrir um í ferðamálastefnunni.

Markmið ráðstefnunnar er því að auka þekkingu allra sem að málefninu koma hérlendis, meðal annars með því að fá dæmi um lausnir og reynslu erlendis frá, styrkja samtal milli aðila og draga fram mögulegar áskoranir sem líklegt er að muni þurfa að fást við hérlendis til framtíðar. 

Aðstandendur ráðstefnunnar koma allir að ferðaþjónustu og skipulagi, stýringu og nýtingu áfangastaða á einhvern hátt.

Samtök ferðaþjónustunnar eru málsvari ferðaþjónustufyrirtækja á Íslandi. SAF gæta sameiginlegra hagsmuna félagsmanna sinna gagnvart stjórnvöldum, vinna að því að fyrirtækin búi við samkeppnishæf starfsskilyrði og stuðla að því að ferðaþjónusta á Íslandi grundvallist á virðingu fyrir landi og þjóð. Nýting ferðaþjónustuaðila á áfangastöðum er grundvallarþáttur verðmætasköpunar atvinnugreinarinnar fyrir samfélagið. Bæði ferðaþjónustufyrirtækin sem standa að SAF og samfélagið í heild hafa því skýra hagsmuni af því að nýting áfangastaða sé sjálfbær og að stýring og möguleg gjaldtaka í samhengi við stýringu sé unnin af skynsemi og með hagsmuni fyrirtækjanna í huga.

Ferðamálastofa er ríkisstofnun og fer með stjórnsýslu ferðamála samkvæmt lögum sem um hana gilda. Ferðamálastofa skal með starfsemi sinni fylgjast með og stuðla að þróun ferðaþjónustu sem mikilvægrar og sjálfbærrar grunnstoðar í íslensku samfélagi að teknu tilliti til þolmarka íslenskrar náttúru og samfélags. Meðal helstu verkefna má nefna rannsóknir, greiningar og miðlun upplýsinga og gagna, m.a með Mælaborði ferðaþjónustunnar, fræðslu- og kynningarstarf, leyfisveitingar til ferðaskrifstofa og ferðasala dagsferða, tryggingar ferðaskrifstofa, almannavarnir og öryggismál, öryggisáætlanir fyrirtækja, þróunar- og átaksverkefni, umsýsla sjóða og svæðisbundin þróun og markaðssetning. 

Umhverfisstofnun þjónustar fólk og náttúru í þágu umhverfisverndar. Umhverfisstofnun starfar að margþættum málaflokkum umhverfismála, þ.á.m. náttúruvernd sem er ein af fjórum áherslum í stefnu Umhverfisstofnunar. Áherslan snýst  fyrst og fremst um vernd líffræðilegrar fjölbreytni og bætta upplifun á sérstöðu náttúrunnar. Umhverfisstofnun hefur umsjón með fjölda friðlýstra svæða á Íslandi sem eru vernduð út frá mismunandi forsendum. Vernargildi getur verið fólgið í viðkvæmum vistkerfum og lífríki, jarðfræðilegum fyrirbærum, landslagi, víðerni og fleiri þáttum.  Sérstaða svæðana laða að sér fólk og tryggja þarf að verndargildi svæða raskist ekki þrátt fyrir álag vegna heimsókna ferðamanna.

Vatnajökulsþjóðgarður var stofnaður árið 2008. Hann nær yfir allan Vatnajökul, stór svæði í nágrenni hans og fjölmörg sveitarfélög. Þjóðgarðar eru friðlýst svæði sem teljast sérstæð vegna náttúrufars eða sögulegrar helgi. Sérstaða Vatnajökulsþjóðgarðs felst einkum í samspili elds og íss. Innan Vatnajökulsþjóðgarðs starfar fjöldi ferðaþjónustufyrirtækja við að kynna ferðamönnum áfangastaði innan þjóðgarðsins, sem eru misaðgengilegir og hafa mismunandi aðdráttarafl og áskoranir. 

Þingvallaþjóðgarður var stofnaður árið 1930 og í lögum kemur fram að hið friðlýsta land skuli ævinlega vera eign íslensku þjóðarinnar undir vernd Alþingis. Árið 2004 voru Þingvellir samþykktir á heimsminjalista UNESCO fyrir einstakt menningarminjalandslag og tengsl við sögu og menningu íslensku þjóðarinnar. Þjóðgarðurinn á Þingvöllum er einn af fjölsóttustu  ferðamannastöðum landsins þar sem yfir milljón gesta koma árlega til að kynnast betur einum mesta sögustað og náttúruperlu Íslands.